Prime minister Narendra Modi chuan nimin, October 31, 2024 khan Gujarat-ah Sardar Vallavhvhai Patel piancham vawi 149-na lawmna hmanpuiin, 'One Nation One Election' leh Uniform Civil Code (UCC) chu a taka chantir a ni thuai dawn tih a sawi.
Prime Minister chuan Kevadia-a Statue of Unity-a hun a hmanah, 'One Nation, One Election' hman rawtna chu cabinet in a pawm thuai dawn a, kumina Parliament thlasik ṭhutkhawmah pharh hman tum a ni, a ti.
"India democracy thuam chakna tur, 'One Nation One Election' nei thei turin hma kan la mek a ni. India chuan developed ram ni tura suangtuahna a lo neihte tihpuitlinna turin chet lak thar a nei dawn a ni," tiin a sawi.
Modi hian Uniform Civil Code chungchang pawh sawi chhuakin, "India chu secular civil code, One Nation One Civil Code nei turin hma lam a pan zel a ni," a ti bawk. Civil code hi Patel-a'n khawtlang inlungrualna tur thuthlung a lo neihin a hrin chhuah a nih thu a sawi bawk.
PM chuan Patel piancham pualin National Unity Day bakah rampumah Deepawali 'festival of Light' lawmna a nih thu a sawi bawk. "He kut hi ramchhungah mai nilo khawvel hmun dangah pawh lawm a ni. US pawhin Nilaini khan White House-ah President Joe Biden hoin Indian American cheng te nen lawmna hun hi hman niin, Diwali chu ramdang pawhin an ram kut angin an lawm ve ṭhin a ni," a ti.
Kum 2019-a Article 370 tih tawp tak chungchang pawh Modi chuan a sawi lang a, "phumbo kumkhua tawh a ni" a ti. Article 370 chu ram pumin Constitution pakhat a neih hmanna daltu a nih thu pawh sawi bawk.
BJP kaihhruai sorkar hnuaiah ramin buaina a tawh ṭhin tam tak chu a bo tawh thu sawiin, buaina siamtute leh a bultumtute chuan umzui nghal zel an nih avangin India tih buai chuan rahṭtha a chhuah loan hre tawh a ni" ta ti. Hmarchhak huam chhunga buaina awm ṭhinte pawh "inbiakna, inrintawnna leh hmasawnna" hmanga umbo tiin a sawi.
