Jammu and Kashmir leh Haryana assembly inthlan result chu nimin khan puan a ni a, Haryana-ah BJP an che tha chhunzawm zel a, Jammu & Kashmir-ah Congress leh National Congress thawkdunin hnehna an chang bawk.
Haryana :
Assembly seat 90 awmna, Haryana-ah hian rorellai BJP chuan seat 48 laiin party malin sorkarna a siam leh thei dawn. Chief minister Nayab Singh Saini chu a CM chhunzawm leh dawn nia sawi a ni bawk.
Haryana-ah hian BJP hi term thum sorkarna an siamna tur a ni dawn a, anmahni hnaih bertu, Congress party chuan seat 36 chauh lain an inthlau hle.
Chief Minister Saini chuan state mipuite hnenah lawmthu sawiin, prime minister Narendra Modi kaihhruaina hnuaiah an state tan hmasawnna hna chak taka thawh zel a tiam. Saini hi Ladwa constituency aṭangin hneh taka thlan tlin a ni.
Jammu and Kashmir :
Kum 10 chuang hnua a vawi khatna atana assembly inthlan neihna, Jammu and Kashmir-ah congress leh National Congress thawkdun chuan assembly seat 90 awmnaah seat 47 lain, sorkarna an siam thei dawn.
National Congress hian seat 41 lain, Congress party hian seat 6 an la. NC hotu, Omar Abdullah chu J&K chief minister thar a ni dawn niin a lang.
J&K assembly inthlan hi thawh thuma neih niin, September 18, September 25 leh October 1-ahte vote thlak a ni. Kum 10 hnu leh, kum 2019-a J&K special status pekna, Article 370 ṭhiah a nih a, J&K state chu union territory pahnih, Jammu and Kashmir leh Ladakh UT-a ṭhen an nih hnua assembly inthlan an neihna hmasa ber a ni.
