PM-in Laos tlawh dawn, East Asia Summit chhim nghal ang

Prime minister Narendra Modi chuan ni hnih cham turin October 10 hian Laos a pan dawn.

Laos prime minister Sonexay Siphandone sawmna a dawn angin Vientiane, Laos hi a tlawh dawn a ni. A cham chhung hian 21st ASEAN-Indian summit leh 19th East Asian Summit ah a tel nghal bawk ang. ASEAN chair dinhmun chelh mek, Laos hian summit pahnih hi a thleng dawn a ni.

PM-in Laos a tlawh chhung hian ASEAN leh India thawh dunna hrang hrangte a sawipui nghal dawn niin Ministry of External Affairs(MEA) chuan a tarlang, "India chuan kumin hi Act East Policy a kalpuina kum10 tlinna chiah niin, ASEAN ram te nena thawhhona chu Act East Policy leh Indo- Pacific Vision atana ban pawimawh ber a ni" tiin MEA chuan an tarlang bawk.

ASEAN -India summit ah hian India leh ASEAN ramte in thlunzawmna chu ennawn a ni dawn a, kawng hrang hranga thawhhona leh hmalam hun atana tihtur duan lawk hrang hrang thlirlawkna te neih tum a ni bawk. "East Asia Summit-ah hian ram hrang hrang hruaitute chuan tel puiin, East Asia huam chhunga thawhhona hrang hrang thuam chak tura tih theih awmte ngaihtuah ho a ni ang," tiin ministry chuan a sawi.