CBI-in pawngsual leh tualthattu lakah chargesheet theh lut

Central Bureau of Investigation (CBI) chuan RG Kar Medical College and Hospital, Kolkata-a doctor zirlai pawngsual leh thahna thleng an chhuina kal zelah, Thawhṭanni khan rinhlelh kai ber Sanjay Roy lakah chargesheet an theh lut.

Pawikhawihna thlen aṭanga ni 58 liam hnuah chargesheet hi thehluh a ni. Hnu chhuina neih lai hian mi hrang hrang inhnamhnawih anga sawi ni mah se agency chuan Thawhṭanni khan Roy-a lakah chauh hian chargesheet hi a theh lut a ni.

Chief Justice of India DY Chandrachud kaihhruai, jugde pathum ṭhutna bench chuan hnuchhui hna thawhte chu endikna nei zelin, he buaina chungchangah hian sorkar laipui leh West Bengal sorkar tan kaihhruaina tur thuchhuah an siam reng bawk. CBI pawhin Supreme Court hnenah an thil chhui chungchangah report an theh lut ve reng bawk.

CBI hian he pawikhawihna kaihhnawihah hian mi panga man tawhin an zingah hian RG Kar Medical College principal hlui Sandip Kumar Ghosh leh Abhijit Mondal Tala Police station officer-in-charge, pawikhawihna chhuina tur ti chingpen nia puhte an tel.

Hetih mek lai hian state enkawl damdawi-ina thawk doctor-te chuan chaw ngheia nawrh an chhunzawm zel a, vawiin hi a ni ngana tur a ni. Doctor-te hian hnathawk loa nawrh an huaihawt chu kar hmasa khan an ti tawp a, mahse an hnathawhna hmuna venhimna mumal tak duan an phut mek nawr turin chaw ngheia nawrh hi an huaihawt leh a ni.

West Bengal chief secretary Manoj Pant chuan Thawhṭanni khan thuthar lakhawm tute kawmin, doctor te chu chaw ngheia nawrh titawp thuai turin a ngen.