Ram chhung hmun hrang hrangah ruah sur nasa avangin harsatna a thleng mek. Indian Meteorological Department (IMD) chuan kumin July thlaa ruah tui tla hi kum dang July thlaa ruah tui tal aiin 9% in a tam zawk niin a sawi.
Delhi-ah sikul khar
Ruah sur nasa avangin Delhi khawpuiah tui a tling nasa a, nunphung a khaihlak phah hle. Nimin khan sorkar leh private sikul zawng zawng khar a ni.
Delhi leh National Capital Region (NCR)-ah Nilaini, July 31 zan aṭang khan ruah nasa takin a sur a, hei vang hian khawpui chhung hmun tam takah tui a tling a, traffic pawh a buai phah hle a ni. Airlines eng emaw zatin flight an tih danglam phah bawk. Indian Meteorological Department (IMD) chuan Delhi-a hian August 5 thleng ruah hi a la sur chhunzawm dawn niin a tarlang a, khawpuia chengte chu ṭul leh pawimawh a nih loh chuan pawn chhuak tam lo turin a chah.
Delhi police-te chuan nimin zing khan ruah surin chhiatna a thlen, in chim leh chhiatna dang thleng report 26 an dawng tawh tih an sawi. Thingkung tlu avangin call 50 an dawng bawk. Subzi Mandi area-a chiatna thlengah mi pakhat thiin, Shastri Park-ah mi pahnih leh Defence Colony-ah mi pakhatin hliam an tuar bawk.
Ruah sur nasa avangin Delhi khawpui boruak bawlhhlawh pawh a ziaawm phah a, Central Pollution Control Board chuan nimin chawhma lam khan Delhi Air Quality Index (AQI) chu 'satisfactory' ah a tla thla niin a sawi. AQI 51-100 inkar hi 'satisfactory' niin, 101-200 'moderate', 201-300 'poor', 301-400 'very poor' leh 401-500 chu 'severe' a ni.
HP-ah chin hriat lohin mi 50 awm
Himachal Pradesh-ah pawh ruah sur avanga sabereka-khuangkaih thlengin a hnawl zinga mi 50 chu chin hriat lohin an awm.
Sabereka-khuangkai hi Shimla, Mandi leh Kulli district-ah te a thleng a, chin hriat loha awmte zawn hna hi thawh mek a nih thu Himachal Pradesh chief minister Sukhvinder Singh Sakhu chuan a sawi. Malana-ah ruahsur vang hian kawng leh hydro power project pawh a chhe bawk a ni. National Disaster Response Force, Indo Tibetan Border Police, police leh home guard-ten chhanchhuah hna hi an thawk a ni.
Uttarakhand-ah leimin thleng
Uttarakhand-ah pawh Nilaini aṭanga ruah nasa taka a sur vangin tuitling leh leimin eng emaw zat a thleng. Ruahsurin chhiatna thlenah mi 10 an thi tawh nia sawi a ni.
Dehradun khawpui chhung hmun tam takah tui a tling nasa a, chenna in tam takah tui a lut a ni. Haridwar-ah pawh kawngpui pawimawhte tuiin a chim a, Khankhal police station pawh tui lutin a tibuai hle. NDRF, SDRF leh tualchhung thuneitute chuan harsatna thlenna hmunah hian chhawmdawl hna an thawk a ni.
Disaster secretary Vinod Kumar Suman chuan Kerdarnath Yatra neih mekna kawngpuiah kawng tla hek leh lung lum vangin biakzina kal mi 200 vel an tangkhang tih a sawi. Khualzin tangkangte hi helicopter hmangin hruai chhuah hna thawk mek a nih thu chief minister Puskhar Singh Dhami chuan a sawi. Uttarakhand-ah hian ni nga chhung chu ruah a la sur chhunzawm dawn niin IMD chuan a tarlang.
