UPSC-in Puja Khedkar IAS nihna a hnawl; A dam chhungin UPSC exam phalsak tawh lo

Union Public Service Commission (UPSC) chuan nihna lem hmanga exam hma chhawntu, Puja Khedkar chu IAS nihna hnawlsak niin a damchhung atan UPSC exam hamchhawn phalsak a ni tawh lo tih a puang.

UPSC chuan thuchhuah siamin Civil Services Examination-2022 (CSE-2022) a lak, Puja Manorama Dilip Khedkar hnenah July 18, 2024 khan nihna lem hmanga exam hmachhawna puh a nih chungchangah July 25, 2024 hmaa insawifiah tura hriattirna lehkha an thawn thu tarlangin, August 4 thleng pawhsei sak turin Khedkar hian a dil thu leh UPSC chuan July 30 thleng hun an pek belh thu an sawi. Jul 30 ral hmaa a insawifiah lo a nih chuan a chungah hremna lekkawh a ni dawn tih an tarlang a, hun tiam chhungin Puja Khedkar hian a insawifiahna a theh lut hman lo a ni.

UPSC chuan chhuichhianna an kalpui hnuah Puja Khedkar chuan CSE-2022 Rules a bawhchhe ngei tih hriat a nih thu tarlangin, kum 2022-a candidate a nihna chu hnawlsak niin a damchhungin UPSC hnuaia exam hmachhawn phalsak a ni tawh lo tih an puang. Khedkar-i thil tih dik lo haichhuah a nih hnu hian UPSC chuan kum 2009 aṭanga 2023 inkara CSE exam-a tling mi 15,000 chuangte chu an endik a, nihna lem emaw dan palzuta tling an awm lo tih an tarlang.