LS-ah Disaster Management Act siamṭhatna tur bill pharh

Sorkar laipui chuan August 1, 2024-a Lok Sabha inkhawmah Disaster Management Act (Amendment) Bill a pharh.

He bill-ah hian national leh state level-a disaster database siam tum a ni a, hei bakah state khawpui leh municipal corporation awmna khawpui lianah 'Urban Disaster Management Authority' dinna tur rawt a ni bawk. Database-ah fund pek chhuah dan kimchang, sum hman ral dan, chhiatna thlen palh atana ruahmanna siam dan, a hlauhawm dan chin leh a kaihhnawih dangte chu policy milpuiin dah tel a ni bawk ang.

Bill hian National Disaster Management Authority (NDMA) leh State Disaster Management Authority (SDMA) chu national level leh state level-a disaster plan siam turin thuneihna a pe bawk a ni. NDMA hian a ṭul angin expert leh consultant-te pawh hna an thawhna kawnga pui turin a ruat thei bawk dawn a ni.