Congress party chuan an party hruaitu, Gaurav Gogoi chu Lok Sabha-a party Deputy Leader atan a ruat. Manikam Tagore leh Md. Jawaid te chu Whips atan ruatin, Kodikunnil Sureh chu Cheif Whip atan an ruat bawk.
Party general secretary, KC Venugopal chuan chanvo an ruat tharte hi nimin khan puangin, Parliamentary Party (CPP) chairperson Sonia Gandhi chuan Lok Sabha speaker Om Birla hnenah ziakin a hriattir nghal bawk tih a sawi. Lok Sabha-a an party tana chanvo pawimawh chelh tura ruat tharte chu a lawmpui thu a sawi nghal bawk a, Leader of Opposition Rahul Gandhi kaihhruainain Congress leh INDIA party-te chuan Lok Sabha-ah mipui tan an bei zel dawn tih a sawi.
Gaurav Gogoi hi Assam chief minister hlui, Tarun Gogoi-a fapa a ni a, kum 2014 khan Lok Sabha member atan Assam-a Kaliabor bial aṭangin a ṭum khatna atan thlan tlin a ni. Kumin inthlanpuiah khan Jorhat bial aṭangin thlan tlin leh a ni. Parliament-ah pawh thawm nei lian pawl niin, nikum August 8-a prime minister Narendra Modi kaihhruai BJP sorkar rin tawk lohna, No confidence motion put luhnaah pawh hma hruaitu a ni. Manipur tualchhung buaina thleng chungchangah PM Modi chu a ngawih tlat avangin, a kaihhruai sorkar rin tawk lohna motion hi put luh a ngai tih a sawi. BJP sorkar lakah zawhna pathum a siam a, 'Eng vangin nge PM hian Manipur a tlawh loh? Eng vangin nge Manipur chungchang sawi chhuak turin ni 80 zet a nghah a, a sawi chhuah chhunah second 30 chhung chuah a sawi? Engvangin nge Manipur CM hi ban a la nih loh?' tihte a zawt a ni.
