December thlaah BJP president thlaktu tur thlang dawn

Bharatiya Janata Party (BJP) national president JP Nadda term chu a tawp hnuah, Lok Sabha inthlan neih tur avang khan June 2024 thleng pawhsei sak a ni. Hei pawh hi a tawp leh tawh a, sorkar laipuiah chanvo a neih tawh bawk avangin BJP president thar tur hi ngaihtuah mek a ni.

BJP chuan kumin December thlaah party president thar tur hi ruat fel hman a tum. Party president thlanna tur hi August 1 aṭangin kalpui ṭan tum a ni a, hemi hma hian district leh state unit hrang hrangah membership drive neih phawt an tum bawk. BJP constitution-ah chuan member-te hian kum kua danah membership hi an tihṭhat leh zel a ngai a, kumina membership campaign an neih turah pawh Prime Minister, party president leh party leader-te chuan an member nihna an tihthar ve leh vek a ngai dawn.

Membership drive hi August 1 - September 15 thleng neih a ni dawn a, October 1-15 chhungin verification neih a ni ang. November 1-15 chhung an Mandal (local unit) president thlangin, Novmeber 16-30 ah district president an thlang ang. State president hi December 1-ah thlan a ni dawn a, state president thlanna 50% tal zawh a nih hnuah, national president thlanna tur hi official-in an kalpui ṭan dawn a ni.