Sorkarin June 25 'Samvidhaan Hatya Diwas' atan a puang Chidambaram-a'n BJP sorkar thuchhuah a chhang let

Central-a BJP kaihhruai sorkar chuan Congress party a beihna chhunzawm zelin, kum 1975-a prime minister hlui, Indira Gandhi hunlaia ram puma huapa Emergency puan ni, June 25 chu ‘Samvidhaan Hatya Diwas’ ah puangin, kumtin hman a nih tur thu a sawi. Hei hi emergency puanin ram mipuite natna nasa tak a thlen hriatrengna turin a ti a ni.

Union home minister Amit Shah chuan ‘Samvidhaan Hatya Diwas’ chuan India mite thinlungah mimal zalenna rahbeh sak vanga natna a thlente an hriatrengna tur leh, democracy venhim duhna rilru an put rengna tur a ni, a ti. Thuneitu inlulung lutuk, Congress party angtein khatianga thil rapthlak an thlen tawh lohna tura venna tur niin a sawi. Emergency puan a nih avang hian mi nuai tel chu an thiam loh ni lohah jail-ah tantir an ni a, media mite chu hrekbeh an ni bawk a ni, a ti.

Congress party senior leader leh Rajya Sabha MP, P Chidambaram chuan BJP sorkar thuchhuah hi chhang letin, emergency chu tihsual palh a ni a, hei hi PM hlui Indira Gandhi ngei pawh khan a pawm thu pawh a sawi a ni, a ti. 'Tuna India rama mipui 75%vel hi kum 1975 hnu lama piang an ni. Indira Gandhi ngei pawhin Emergency puan chu tihsual palh a ni tih a pawm a ni. Constitution pawh siamṭhat niin, emergency pawh awlsam taka puan mai theih a ni tawh lo. BJP hian engatinge kum zabi 18 leh 17 hunlai te pawh a chhut tel mai loh ni?" tiin a sawi. Kum 50 dawn liam tawh hnua emergency puan dik leh dik loh chungchanga lo inhnial zui vak chu a engnge a sawtna awm tiin, heng thil thleng aṭang hian zirlai ṭha tak an zir chhuah tawh zawk thu a sawi. BJP chu tun hma lam thil ngawt buaipui tawh lo turin a ti bawk.