Uttar Pradesh-a self-styled godman, Bhole Baba aka Narayan Saakar Hari-an satsang (prayer meeting) a huaihawta inpawngnekna thlengah Thawhlehni khan mi 121 an thi a, hliam 21 an awm. Thi zingah hian hmeichhia leh naupang eng emaw zat an tel.
Inpawngnekna thlenna hmun hi Hathras-ah a ni a, mi nuai 2.5 vel an pungkhawm nia sawi a ni. Police-te chuan meeting neihna hmun hi hetiang zat mipui punkhawmna tur atan chuan a te lutuk nia sawiin, pung khawm an tam avangin mipui an innek nasa hle niin an sawi.
He chhiatna thleng vang hian police-te chuan self-styled godman thachhang dawltu leh meeting buaipuitute lakah thubuai an ziak lut a, thil thlen dan chhui chiang turin committee din a ni bawk. Police-ten FIR an ziah luhah hian prayer meeting neihna turah hian mi 80,000 chin punkhawm phalsak an ni a, mahse mi nuai 2.5 chuang zet an kal khawm niin an talrang. Meeting huaihawttute hian phalna an dilna lai hian kal khawm zat hi an zep a, traffic buaipuina lamah pawh pui loin, inpawngnekna thlen dan tak pawh an zep niin an tarlang. Bharatiya Nyaya Sanhita hnuaiah thubuai an siamsak a ni.
Prayer meeting zawh hnuah kal khawm zinga tam tak chuan pawn lama chhuah mai tum loin, self-styled godman kal chhuak tur lei rahna hnu chu lak tumin an inchuh a, hei vang hian mipui hi an innekbuai ta nia sawi a ni.
Chief minister Yogi Adityanath chuan inpawngnekna thlenga thi chhungte hnenah Rs nuai 2 ṭheuh leh, hliam tuarte hnenah Rs 50,000 ṭheuh pek an nih tur thu a puang.
Prime minister Narendra Modi leh president Droupadi Murmu te chuan vanduaina tawk chhungte an tawrhpui thu sawiin, PM chuan sorkar laipui chuan a theih dan apiangin UP sorkar chu a puih tur thu a sawi bawk.
