Bihar-ah ni 15 chhungin lei 7 a chim

Bihar-ah nimin zing khan Siwan district-a Gandaki lui chunga lei dawh a chim a, an state-ah ni 15 chhung lei pasarih a chimna a ni.

Nimina lei chim hi lei lian vak lo niin, Deoria block-a awm a ni a, Mahrajganj leh thingtlang khaw eng emaw zat inkalpawhna ber a ni. Lei chimah hian thi leh hliam erawh an awm lo nia tarlan a ni.

Deputy development commissioner Mukesh Kumar chuan lei chimna chhan tak hi hriat chian a la ni lo a, chhui chian mek a nih thu a sawi. He lei kum 1982-83 a dawh niin, ni rei vak lo liam taah khan chei ṭhat a ni tih a sawi.

Tualchhung mite chuan tun hnaiah ruah nasa taka surin Gandaki lui a tih len avangin, lei structure hi a ti nghet lo nia an ngaih thu an tarlang. Ni 15 chhungin Bihar-ah hian Siwan, Madhubani, Araria, East Champran leh Kishanganj district-ahte lei hi pasarih a chim hman a ni. Bihar sorkar chuan lei hrang hrang chim chhante chhui chiang tur hian high-level committee a din tawh bawk.