Delhi Court-in AAP leh BRS hruaitute judicial custody pawtsei

Delhi-a Rouse Avenue Court chuan Delhi excise policy kaihhnawiha thubuai siamsak, Aam Aadmi Party (AAP) hruaitu Manish Sisodia leh Bharat Rashtra Samithi (BRS) hruaitu K. Kavitha te judicial custody awm chen chu nimin khan a pawtsei.

Sisodia leh Kavitha-te hi nimin khan video conference kaltlangin court-ah hian an inlan a, special judge Kaveri Baweja chuan hren an nih hun hi a lo pawhseisak a ni. Kavitha hi ED leh CBI-in case pahnih an siamsak hnuaiah judicial custody-a dah a ni.

Kavitha hi March 15 khan Hyderabad-a Banjara Hills-a a chenna in aṭangin Enforcement Directorate (ED) chuan manin, Tihar jail aṭangin CBI in an man nawn leh bawk. Thawhlehni khan Delhi High Court chuan Kavitha bail dilna hi a lo hnawlsak tawh bawk. High Court chuan BRS hruaitu hi excise policy kaihhnawiha sum inpek chungchangah inhnamhnawihna a nei niin a sawi.

Sisodia hi February 26, 2023 khan Central Bureau of Investigation (CBI) in manin, a hnuah ED-in an man nawn ve leh bawk. Nikum February 28 khan Delhi cabinet minister a nihna aṭangin a bang tawh bawk.

Delhi exice policy kaihhnawihah vek hian central agency pahnih chuan Delhi chief minister, Arvind Kejriwal an man tawh bawk a ni. Nimin khan Kejriwal chuan Delhi High Court-a bail dilna a thehlut. Excise policy kalpui a nih danah thil fel tawk lo awm nia sawiin, Delhi lieutenant governor-in chhui chiang tura CBI a tih hnuah, kum 2022 khan Delhi sorkar chuan he policy hi a lo titawp tawh a ni.