Central-a BJP kaihhruai NDA sorkar leh Congress kaihhruai, eptu pawl ṭangrual chuan Lok Sabha Speaker post an inchuh dawn a, kum tam tak hnua a thlen vawi khatna tur a ni.

Lok Sabha Speaker leh deputy ruat chungchangah hian roreltu lam leh eptu lamten an pawm tlante lungrual takin an thlang tlangpui a, kuminah erawh seat insem danah NDA leh INDIA lam an inrem thei lo a, hei vang hian Speaker post pawh an inchuh dawn ta a ni.

Vawiin chawhma dar 11-ah Lok Sabha Speaker hi thlan a ni dawn a, rorellai lam aṭangin BJP MP term thum lo ni tawh leh, 17th Lok Sabha-a speaker Om Birla chuan Speaker post hi a chuh leh a, eptu lam aṭangin Congresss MP term riat lo ni tawh, Kodikunnil Suresh-a'n a chuh ve bawk. Suresh hi 18th Lok Sabha-a MP ni rei ber a ni mek.

BJP kaihhruai NDA chuan Lok Sabha-ah hian majority a neih avangin Birla hi tling tura ngaih a ni. NDA lam hian MP 293 neiin, INDIA hian 232 a nei.

Suresh chuan nimina Speaker post chuh tura nomination a thehluh hnuah, "Hei hi party thutlukna a ni. Tih dan phung a awm ve a, Deputy Speaker chu eptu lam chantir a ni ṭhin. Mahse BJP hian hei hi an pawm thei lo a, chhun dar 11:50 thleng an chhanna kan ngaihchan hnuah, engmah sawi an nei loh avangin Speaker post chuh tur hian nomination hi kan thehluh ta a ni," a ti. Mahse union minister Piyush Goyal chuan Deputy Speaker post hi eptu party lam chantir tur tih dan a awm chuang lo tiin a chhang thung.

Ziaka dah awm kher lo mah se, House-ah rualkhai taka thil kalpui a nih theihna atan eptu MP chu deputy speaker post chelh tir an ni ṭhin. Mahse prime minister Narendra Modi kaihhruai sorkar hmasa (2019-2024) ah khan Deputy Speaker post hi tumah pek an ni lo a, 2014-2019 sorkarah khan rorellai, BJP thawhpui AIADMK MP Thambidurai chu dah a ni bawk.

18th Lok Sabha-a Speaker leh Deputy Speaker ruat chungchangah hian eptu party- te chuan BJP hian eptu lam tan deputy post hi an dah chuan, BJP Lok Sabha speaker candidate, Om Birla chu lungrual taka an pawm nghal tur thu pawh an sawi. Mahse eptu lam thil phut hi BJP chuan a pawmpui lo a, Birla chu Speaker atan lungrual taka pawm phawt a, a hnuah a deputy tur chu la ngaihtuah chawp tura dah an ti thung. An remruat dan hi eptu lam chuan an thlawp thei lo a, hei vang hian Suresh chu Speaker post chuh tur hian an ti ve ta a ni.