Karnataka sorkarin artificial colour hman a khap

Karnataka sorkar chuan an state chhungah ei tur- thlai, arsa leh sangha siamnaah artificial colour hman a khap.

State Food Safety and Standards Department chuan state chhunga kebab siamna hrang hrangah artificial colour an hmang tih complaint eng emaw zat an dawn hnuah he thupek hi an ti chhuak a ni. Department hian kebab sample 39 chu laboratory-ah an endik a, heng zinga pariata artificial colour an hman chu mihring hriselna atana him lo a ni tih hmuh chhuah a ni.

Health minister Dinesh Gundu Rao chuan mipuite himna tur an ngaihtuah avangin kebab-a artificial colour hman khap an nih thu a sawi a, taksa tana ṭha lo hriselna nghawng thei an ni, a ti. He khapna thupek zawm lo an man chhuahte chu na taka hrem niin, kum sarih thleng jail tantir leh, Rs nuai 10 thleng chawi tir theih an ni ang, a ti.

Food Safety and Standards (Food Products Standards and Food Additives) Regulations, 2011 rule 16 hnuaiah kebab siamnaah hian artificial colour eng chi pawh hman khap a ni. Kumin kumtir lam khan Karnataka sorkar hian 'Gobi Manchurian' leh 'cotton candy' siamna atana hman lar tak, food colouring agent Rhodamine-B hman a lo khap tawh bawk.