Kerala Assembly-in state hmingthlakna tur resolution pass

Kerala Assembly chuan Thawhṭanni khan an state hming thlak tura sorkar laipui an ngenna, resolution pahnihna chu lungrual takin an pass. Kerala state tih chu 'Keralam' tia thlak an tum a ni.

Kum khat dawn liam ta khan state hming thlakna tur resolution hi Assembly chuan a lo pass tawh a, sorkar laipuiah an thehlut a, mahse siamṭha leh tura tiin sorkar laipui hian a thawn kir leh a ni. Resolution pahnihna an pass hi sorkar laipuiin a pawmsak turin an thawn leh ang.

'Keralam' tia state hming thlak duhna resolution hi chief minister Pinarayi Vijayan-a'n a pu lut a, rorellai LDF leh eptu UDF member-ten an thlawp vek a ni.

India-in zalenna a hmuh hnuah state leh khawpui hming tam tak thlak a lo ni tawh a, kum 2007 khan Uttaranchal chu Uttarakhand tia thlak a ni a, 2011-ah Orissa chu Odisha tih niin, 2006-ah Pondicherry Union Territory pawh Puducherry tih a lo ni tawh bawk. Khawpui hming zingah pawh Bombay leh Madras chu Mumbai leh Chennai tia thlak an ni bawk.