Aam Admi Party (AAP) chuan Tihar jail-a awm mek, Arvind Kejriwal-a enkawl a nih dan chungchangah jail thuneitute chuan dawt an sawi nia tarlangin, hei hi All-India Institute of Medical Sciences (AIIMS) hnena ziaka Diabetologist an dilna aṭanga a chian thu an sawi.

AAP hruaitu, Saurabh Bharadwaj chuan tan in thuneitute'n Kejriwal-a sugar che reng enkawlna tur an neih ṭhat thu an hriattir nia sawiin, a dinhmun dik tak erawh April 20 aṭanga an hriat danin a ngaihṭhatthlak loh tih a sawi. Bharadwaj chuan,"Vawiinah hian chief minister Arvind Kejriwal hian enkawlna ṭha a dawng lo tih hi kan chiang a ni. Tan in DG, Sanjay Baniwal ngeiin Kejriwal-a tanna, jail no. 2-a diabetes enkawltu tur specialist an mamawh thu AIIMS hnena a dilna kan hmu a ni," a ti. AAP hruaitute hian press mite hmaah Tihar jail thuneitute chu BJP thu anga Kejriwal-a blood sugar report pawh an duh ang zat tarlang mai mai leh, sugar level a hniam chauha a dinhmun dik tak tarlangah puhin, Kejriwal-a ngenna anga diabetologist hmuh pawh an phalsak lo niin an sawi bawk.

Party hruaitu Atishi chuan phiarruk a nih avangin Kejriwal chu a mamawh insulin pawh pek an phal lo niin a sawi ve bawk. Atishi hian Enforcement Directorate (ED) te chuan court-ah dawt an sawi nia puhin,"Kejriwal-a tan hian insulin an neih thu leh AIIMS specialist an rawn thu an sawi a, mahse, diabetologist emaw, endocrinologist pawhin a diet chart hi an siamsak lo. ED-te hian Kejriwal-a'n insulin a mamawh lo niin an sawi a, a mamawh lo nia an sawi chhan, tuna a diet chart hi MBBS doctor ni loin dietician siamsak chauh a ni," tiin a tarlang.

ED-in an man hnuah Delhi chief minister, Arvind Kejriwal hian man a nih a khinna hi Delhi high court leh Supreme court chuan an hnawl ve ve tawh a, Delhi rouse avenue court-in hren chhunzawm tura a tih angin tunah hian Tihar jail-ah a awm mek a ni. Tihar jail aṭang hian Kejriwal hian Zirtawpni khan a hriselna dinhmun uluk taka vil duhna avangin ni tin minute 15 chhung physician hmuh leh jail-a insulin pek a dil a ni.