Session tharah Andhra Pradesh-a zirlaite'n PEN neih a ngai dawn

Andhra Pradesh school education department chuan kum 2024-2025 session thar ṭan hunah chuan zirlai zawng zawngte'n Permanent Education Number (PEN) an neih a ṭul tur thu an sawi.

School education commissioner, S. Suresh Kumar chuan PEN kalpui tura an hmalakna chu sikul kum thar apianga zirlaite'n sikul an sawn huna an awlsam phah nana ti an nih thu a sawi. Suresh Kumar hian District Education Officer (DEO) zawng zawngte hriattirna an pek tawh thu sawiin, district leh mandal education officer te kaltlanga student info portal-ah zirlaite tan sikul seat awl an hriat theihna awlsam tur buatsaih a nih thu te, DEO-te hian zirlai insawnte tana harsatna awm thei zawng zawng lo chinfelsak tur an nih thu a sawi bawk. Kumar hian zirlai naupangte chu sikul danga an insawn dawnin nu leh pate'n SMS an dawng anga, an document mamawhte chu class 1 an nih laia digitised vek a nih tawh dawn avangin naupang Aadhar leh PEN chiah hi a ngai tawh dawn niin a sawi.

Zirlai naupang, a bikin pawl 2, pawl 5, pawl 7 leh pawl 8 vela sikul an sawn hian headmaster-te'n document chi hrang hrang; record sheet, transfer certificate, caste, birth certificate leh a dangte an phut ṭhin avanga thil a harsat ṭhin thute a sawi a, hei hi zirlai leh nu leh pate tan thil hautak a nih bakah, sikul ban phah hialte pawh an awm niin Suresh Kumar hian a sawi bawk.