Gorkha hnuaia hnam peng 11 ST list-ah dah kan tum : Amit Shah

Union home minister Amit Shah chuan Pathianni khan West Bengal, Darjeeling-a BJP-in election rally an neihah tel thei lo mah se, pung khawmte hmaah audio recording hmangin thu a sawi a, Amit Shah hian Gorkha hnam peng 11-te Scheduled Tribe list-a dah an tum thu a sawi.

Home Minister Shah hian audio record hmanga a thusawiah hian sorkar laipuiin Gorkha hnamte ST list-a dah luh an tum thu hi a sawi a,"Kan Gorkha unaute hnena ka chah duh chu BJP hian rorelna dik in hmuh kan duh a, chumi atan chuan kan bei dawn a ni. India constitution hian rorelna dik a pe ngei ang che u," a ti. Shah chuan Gorkha hnamte mamawh chu an ngaih pawimawh thu leh, Gorkha-te'n India ram tana an beihna zawng zawngte chu a hriat reng thu a sawi bawk. Prime minister Narendra Modi pawhin March 9 khan Siliguri-a rally neihnaah BJP chuan Gorkha-te harsatna an sutkian ṭep tawh thu a sawi a, BJP chu Gorkha unaute harsatna tawh chungchang pawh an ngaihven reng thu a lo sawi tawh bawk.

Darjeeling-a BJP election rally hi Lebong-ah neih niin, he constituency-ah hian Lok Sabha inthlan atan BJP candidate, Raju Bista a ding dawn a, April 26 hian an inthlang dawn a ni. Raju Bista hi he lai bial tana MP ni lai mek ni bawkin, 2019 Lok Sabha inthlanah khan vote nuai li chuangin a khingpui a hneh a ni.