Delhi chief minister, Arvind Kejriwal-a'n Enforcement Directorate (ED)-in Delhi excise policy thubuai kaihhnawiha an man a khinna chu Delhi high court chuan nimin khan a ngaihtuah. Delhi high court hian Kejriwal hi chhuah a nih rih loh tur thu a puang a ni.
Kejriwal-a petition hi Justice Swarana Kanta Sharma ṭhut bench-in a ngaihtuah a, Arvind Kejriwal-a aiawha ding, Abhishek Singhvi chuan Kejriwal chu court chuan chhuah nghal se a duh thu sawiin, man a nih chhan leh ED-in an hren chhan chu thil dik lo a nih thu a sawi. Abhishek Singhvi hian Kejriwal man a nih dan chungchangah hian Prevention of Money Laundering Act (PMLA) section 50 zawm a nih loh thu court-ah hian tarlangin, thubuai kal mek danah Kejriwal man kher chu thil ṭul nia a lan loh thu te, Kejriwal chuan inthlan zawh lam, June 2-ah chauh chhuah a inbeisei thu te a sawi bawk.
Arvind Kejriwal-a nupui, Sunita Kejriwal pawhin thuchhuah siamin, Delhi excise policy thubuaia pawisa chheprelh awm nia an sawi chungchanga thudik chu vawiin hian a pasal Kejriwal-a'n a tarlan tur thu a sawi. Sunita hian ED-te chuan he thubuai kaihhnawihah hian hmun hrang hrang 250 chuang an dap thu leh, Manish Sisodia in te, Sanjay Singh-a in leh Satyendar Jain-a in te pawh dapin, pawisa chheprelh an sawi hi khawiah mah a awm lo a ni, a ti.
Hetih lai hian sorkar laipui aiawha ding, additional solicitor general, SV Raju erawh chuan Arvind Kejriwal-a petition theh luh hi ED hian Thawhlehni khan an hmuh ve chauh thu leh, chhanna pe tura petition an zir chian ve phawtte a ngaih avangin court chuan kar thum tal hun pe se a duh thu a sawi thung a ni. ED-in Kejriwal an hren theih hun chhung court-in a phal chin chu vawiin hian a tawp tawh dawn avangin, Central Bureau of Investigation (CBI)- chuan Kejriwal hi hren chhunzawm an dil dawn nia hriat a ni.
