J&K-ah AFSPA hman chhunzawm a ni tawh lo maithei

Union home minister Amit Shah chuan Jammu & Kashmir-a Armed Forces (Special Powers) Act (AFSPA) hman chu hman chhunzawm a nih tawh lohna turin sorkar laipuiin a ngaihtuah mek niin a sawi.

Amit Shah hian Nilaini khan J&K aṭanga sorkar laipui sipaite koh let an tum thu leh, J&K-a dan leh thupek kenkawh chu UT police-te kuta dah an tum tawh thu sawiin, AFSPA pawh hnuh kir tuma ngaihtuahna an sen mek thu a sawi a ni. Union defence minister Rajnath Singh pawhin J&K aṭanga AFSPA hnuhdawh an tum thu hi tun thla tir khan a lo sawi tawh bawk. Amit Shah chuan AFSPA chu northeast state zinga hmun tam zawkah hman a nih tawh loh thu sawiin, northeast-a AFSPA hmanna hmun ṭhenkhat leh J&K-ah pawh pawl tam tak chuan AFSPA titawp tura an nawr reng thu a sawi a ni.

AFSPA hi sorkar laipuiin ram chhunga buaina leh harsatna awmna hmun anga a puan huam chhunga sipaite'n venhimna atana mi man leh dawp, in dap leh silaia kah thlenga thuneihna tawp an neihna a ni a, hei hi sorkar laipuiin dan leh thupek kenkawh a nih theih nana a tih a ni. Kum 2019-a Jammu & Kashmir inhung bikna, article 370 ṭhiah a nih a, Union Territory pahniha ṭhen a nih hnuah, J&K-ah hian inthlan buatsaih a la ni lo a, Amit Shah hian hemi chungchang hi sawi langin, Supreme Court-in September thla ral hmaa inthlan nei tura a hriattir anga J&K assembly inthlan neih tum a ni, a ti.