Chhattisgarh-ah Naxal hel paruk kap hlum

Chhattisgarh police-te chuan Nilaini khan Bijapur district-ah Naxal hel leh sipaite inkapin, Naxal mi leh sa paruk kah hlum an nih thu an puang. Naxal hel thi zingah hian hmeichhe pahnih an tel a ni.

Naxal hel leh sipaite inkahna hmun hi Chikurbhatti leh Pusbaka khuaa ramhnuaiah a ni a, hei hi Basaguda police station huam chhunga awm a ni. Bastar Range Inspector General of Police, P. Sundarraj chuan helpawl nena inkahnaah hian District Reserve Guard (DRG), Central Reserve Police Force (CRPF) leh CoBRA (Commando Battalion for Resolute Action) te an tel thu sawiin, Naxal helpawl zawn chhuah tum hian beihpui an thlak thu a sawi. P. Sundarraj chuan inkahna a tawp hnuah Naxal helpawl mi ruang paruk an chhar thu leh, silai leh ralthuam dang eng emaw zat an thuhrukte an hmuhchhuah thu a sawi bawk.

Heng helpawl mi an kah hlumte nihna hi tarlan a ni lo a, police-te chuan tute nge an nih an la hriat theih loh thu an sawi. Mi paruk kah hlum bakah hian mi eng emaw zat chu an kap hliam ngeia an rin thu sawiin, Naxal helte zawn chhuah hna hi an thawh chhunzawm zel tur thu an tarlang a ni.