Sonam Wangchuk-a'n chaw ngheia nawrh a titawp

India constitution sixth schedule-a Ladakh dah leh state-a hlankai phuta chaw ngheia sorkar laipui nawrtu, Sonam Wangchuk chuan ni 21 hnuah a chaw nghei a titawp. Wangchuk hian Ladakh khawpui, Leh-ah a thil phutte nawr nan March 6 aṭang khan chaw a nghei tawh a ni.

Chaw ngheia sorkar laipui a nawr a tihtawp chungchangah, Sonam Wangchuk chuan Thawhlehni zan khan,"Ni 21 a tling ta. Naktuk aṭang chuan hmeichhe pawlin chaw nghei hi an chhunzawm ve tawh anga, a hnu lamah ṭhalaite, chumi hnuah puithiamte pawhin chaw an nghei ve leh anga, chutiang chuan a kal chho zel ang," a ti. Wangchuk chuan,"Ram hruaitu mi dik leh hmathlir nei, fing bawk si kan ram hian a mamawh a, hetiang mi hi an ni tih PM Modi leh Amit Shah te hian an la lantir thuai ka beisei. Politician hmathlir nei lo leh nungchang hre lo ringawt hi chu kan mamawh tawh lo," tiin prime minister Narendra Modi leh union home minister Amit Shah te chu an thutiama ding turin a ngen zui bawk.

Wangchuk hi nawrh a huaihawt chhung hian pawn khaw vawtah a mu a, khaw vawh lam hi -10 degree celcius niin, mi 350 chuangin a chaw nghei chhung hian an ṭawiawm a ni. Thawhṭanni khan Wangchuk thlawpna lantir nan mi 5,000 chuang an pung khawm bawk a, Kargil Democratic Alliance (KDA) chuan Kargil-ah Wangchuk thlawpna lantir hian chaw an nghei ve bawk. Sonam Wangchuk-a'n ni 21 chaw ngheia sorkar laipui a nawrna hi Mahatma Gandhi-a'n India zalenna phuta chaw ngheia a nawrh chen chiah a ni.