Delhi pana loneitute nawrh huaihawt mektu; Kisan Mazdoor Morcha (KMM) leh Samyukta Kisan Morcha (Non-Political)- (SKM-N) hruaitute chuan ram chhung hmun hrang hranga loneitute zawng zawng chu March 6-a Delhi pan khawm turin an hriattir.
Loneitu pawl hruaitute hian loneitu zawng zawngte Delhi pan khawm tura ngenna an siam bakah hian March 10-ah darkar li chhung rel kawng hrang hrang dan an tum thu an sawi tel bawk. Hetih lai hian Punjab leh Haryana-a loneitute erawh awmhmun khuara an awm mekna, Shambhu-Ambala leh Khanuari-ah te an la awm chhunzawm dawn thung a ni.
KMM hruaitu, Sarwan Singh Pandher chuan loneitute bakah kut hnathawktu leh tribal te thlengin March 6 hian Delhi pana kal khawm tura an duh thu sawiin, bus leh rel hmanga Delhi pan khawm turin a chah a ni. "Sorkar hian loneitute chu tractor-trolley tel loin lo thawk chhuak rawh se a ti fo a, chuvangin kan unaute, bus leh rel hmanga Delhi pan mai turin kan ngen a ni. Punjab leh Haryana-a loneitute erawh chu state pahnih inrinaah hian an la awm chhunzawm thung ang. March 10 hian ram chhung hmun hrang hranga rel kawngte chu chhun dar 12 aṭanga tlai dar 4 thleng dan kan tum bawk a ni," a ti.
Pandher chuan sorkar laipui chu loneitu, an chanvo phuta nuarte hmelma ang maia enah a puh a,"MSP chungchanga kan phut leh beisei ang kan hmuh hma leh, Swaminathan report anga hmalakna kalpui a nih hma chu kan nawrhna hi kan chhunzawm zel ang, Kan harsatnate sut kian a nih hma chu kan beidawng dawn lo" tiin a sawi bawk.
