Haj 2024 inbuatsaihna atan Haj Suvidha app tlangzarh

Union minority affairs minister, Smriti Zubin Irani chuan kum tina Muslim sakhaw zuitute'n hmun thianghlim (Mecca) tlawh a, sakhaw serh leh sang an hman ṭhinna hun, Haj kaihhnawiha inzirtirna, thlawhtheihna kal dan, leh thlenna chungchang thlenga awlsam zawka he hun hmangtu turte'n an hriat theihna tur, Haj Suvidha app a tlangzarh.

Smriti Irani hian he thu hi Haj 2024 hmang tura kal turte training petu tur zirtirna, Training of trainers programme, New Delhi-a Vigyan Bhavan-a buatsaihah a sawi a, minister of state for minority affairs, John Barla chuan a telpui bawk a ni. He hunah hian state leh union territory hrang hrang aṭangin trainer 550 an tel niin tarlan a ni. Training of trainers programme hi Haj hmanga kal turte zirtirna petu turte zirtirna leh thil pawimawh inhrilhna hun a ni a, hei hi sorkar laipuiin Haj hman dan chungchanga kalphung felfai leh nuam zawk, a hmangtute tana hriatrengtlak a nih theihna tur atana hmalakna a nih thu Smriti Irani chuan a sawi.

Haj Suvidha app hi BISAG-N-te'n minority affairs minister kaihhruaina hnuaia an siam a ni a, he application hmang hian Haj hmang tura kal tumte'n awlsamna nasa tak an neih theih phah dawn bakah, thil dang buaipui lutuk ngai lo a, sakhaw thila hun an hmanna tur lamah rilru an sen tam zawk theih phah beisei a nih thu an tarlang. Smriti Irani hian Haj guide 2024 pawh a tlangzarh nghal a, he guide hi ṭawng chi hrang hrang 10-a buatsaih a ni.