Union council of minister ṭhu khawm

Prime minister Narendra Modi kaihhruaina hnuaiah, union council of minister-te chu sorkar thar a pian hmaa a hnuhnung ber atan Pathianni khan an ṭhu khawm a, he hunah hian term thara sorkarna siam leh ngei tumna nen, ni 100 chhunga an hnathawh turte an sawi ho.

PM Modi chuan central-a NDA-in sorkarna an siam leh ngei tur thu sawiin, 2047-a India hmasawn zawk siamna tur, Viksit Bharat 2047 tihlawhtling tura ruahmanna siam hrang hrangte entirna neiin sawi ho a ni a, kum nga dang lo awm leh tur atana hmalakna turte kimchang zawka zir hona neih a ni bawk. "Viksit Bharat hlawhtlinna kawng tur duang hian kum hnih chhung ngawrh taka beih a ni a, sorkar pumpui chet chhuahna niin, ministry zawng zawng bakah state sorkar nena inbiak rawnna te, zirna in aṭanga rawtna te, thiamna bik nei, pawl hrang hrang duh dan, sumdawng liante hmathlir leh ṭhalaite ngaihdan lak thlengin kalpui a ni. Heng zawng zawng hlawhtlin nan hian meeting vawi 2,700 chuang neih a ni a, level hrang hrangah workshop leh seminar-te neih niin, ṭhalaite hnen aṭangin rawtna nuai 20 chuang dawn a ni bawk," tiin council of minister ṭhut khawmnaah hian tarlan a ni.

Prime Minister hian minister dangte chu a zau thei ang bera zir chianna leh ngaihdan laa, ngaihtuahna tharlam la khawm turin a lo chah tawh a, heta ṭang hian council of minister ṭhut khawmna hnuhnung berah hian sorkar thar an siam huna ni 100 chhunga an hnathawh dan turte sawiho theih turin ruahmanna a lo siam tawh a ni. Sorkar thar atana hnathawh tura ruahmanna siam chungchang sawi honaah hian Niti Aayog pawh an tel.