Prime Minister Narendra Modi chuan thingtlang mite tana sorkar laipuiin in sak ṭanpuina a pek tur, Pradhan Mantri Janjati Adivasi Nyaya Maha Abhiyan (PM-JANMAN) hnuaia inziak lut mi nuai khatte tan Rs. vbc 540 a pe chhuak.
PM-JANMAN sum pek chhuahna hun hi PM Modi hian video conference kaltlangin a hmang a, PM-JANMAN scheme chu India tribal hmeichhe president hmasa ber leh preisdent ni lai mek, Droupadi Murmu zara hlawhtling thei a nih thu a tarlang. PM hian scheduled tribe-te tana hamṭhatna hrang hrang awmte chu kum 10 chhungin a let ngaa a pun thu leh, tribal zirlaite tana scholarship pawh a let hnih aia tama a pun tawh thu sawiin, a sorkarin a tum ber chu chan chhe zawka langte dinhmun ṭhaa hlan kai leh sorkar laipuiin scheme a neih hrang hrangte'n mi zawng zawng hnen a thlen theih chu an duh ber thu a sawi bawk.
Scheme hnuaia pawisa sem chhuahna hunah hian PM Modi hian ṭanpuina dawngtu ṭhenkhatte kawmna hun a hmang nghal a, sorkar laipui hmalaknaa ṭanpuina an dawn hrang hrang zingah ei rawngbawlna gas te, eng te, tui leh in te an neih theih phah thu an sawi hlawm a ni. PM-JANMAN hi Particularly Vulnerable Tribal Groups (PVTGs) te'n an nunphunga hmasawnna an neih theih nan Janjatiya Gaurav Diwas pualin nikum November 15 khan tlangzarh a ni a, budget-ah hian Rs. vbc 24,000 ruahman a ni.
