India classical language pakua zingah Persian telh dawn

Ni hnih cham tura Iran-a zin, External Affairs minister, S. Jaishankar chuan Iran Foreign Affairs minister, H. Amir-Abdollahian nen Thawhṭanni khan thuchhuah inṭawm siamin, India-in New Education Policy (NEP) a hman tur hnuaia classical language pakua zingah Farsi (Persian) chu telh a nih tur thu an puang.

Jaishankar hian India sorkar chuan Iran nena ṭawng, culture leh thuziak dan phunga an inzawm chu a ngaihpawimawh thu sawiin, he hmalakna hian nasa zawka ram pahnihte inkara inlaichinna ṭha zawk a siam theih beisei a nih thu a tarlang. India-in classical language huanga a dah hmasak ber hi Tamil niin, hei hi 2004 khan dah a ni a, Tamil bakah hian Sanskrit, Kannada, Malayalam leh Odia te pawh classical language huangah hian dah a ni tawh. NEP ruahmanna hnuaiah hian Pali, Persian leh Prakrit te hi an thu leh hla hausakna avanga vawn him duhna avangin telh an ni bawk.

S. Jaishankar leh H. Amir-Abdollahian te hian ram pahnih inkara thawh dunna tur chi hrang hrang sawi dunin, ram inrelbawlna chungchang leh insumdawn tawnna thu an sawi ber a, hetih rual hian ram pahnih mipuite inzawmna thuk tak awm sa chuan thawh dunna kawng zau tak a hawn belh zel a ni tiin an sawi. Jaishankar hi Foreign Affairs minister bakah hian Minister of Roads and Urban Development nen pawh an inkawm. Iran President, Dr. Ebrahim Raisi hmu bawkin, Prime Minister Narendra Modi thuchah a thlen a ni. Iran-a a cham chhung hian mi pawimawh tak tak kawmin India leh Iran thawh dunna tur kawng hrang hrang an sawi zingah inkalpawhna leh sumdawnna kawng zauhna tur atana Iran-a Chahabar lawng chawlh hmun, India-in a siam tihchangtlunna turte an sawi tel bawk a ni.