March 2025 thleng ei theih oil lak luh man a hniamin kalpui dawn

Sorkar laipui chuan ei leh ina hman chi oil, ram dang aṭanga lak luh ṭhin chu lak luh man tisang loin, a man hniam anga kalpui chhunzawm a nih tur thu a sawi a, oil lak luh man hniam hi March 2025 thleng hman tur niin thuchhuah an siam.

Ram dang aṭanga oil lak luh man hniam hi kumin March thla hian tawp tawh tur a ni a, hei hian crude palm oil, crude sunflower oil leh crude soyoil te a huam a ni. Oil lak luh man tihsan loh chungchangah hian rawngbawl nana oil zuar ṭhin, Suvin Group CEO, Sandeep Bajoria chuan oil lak luh man a hniama kalpui chhunzawm chu an beisei thu leh, inthlan tur avanga tihsan a nih an rin loh thu a sawi.

India rama thil man sang zel tur ven nan 2022 leh nikum khan chhangphut buh thawn chhuah a khap a lo tawh a, thil man sang lutuk tur ven nan hian New Delhi sorkar pawhin kuminah mills-te chu chini thawn chhuah a khap bawk. Union trade minister, Piyush Goyal chuan chhangphut, buhfai leh chini thawn chhuah khapna chu hun eng emaw chhung la kalpui chhunzawm tur thu a sawi ve bawk a ni.

India hian palm oil hi Indonesia, Malaysia leh Thailand aṭangin a lei ber a, soyoil leh sunflower oil hi Argentina, Brazil, Russia leh Ukraine aṭangin a la lut ṭhin thung. India-in palm oil a lak luh hi thla li chhunga a san ber ni turin December thla khan lak luh tam ber ṭum a thleng a, hei hi a man a tlawm avanga hralh a kal vang a ni.