Kumina state assembly inthlan nei tur panga zinga phase 2-a inthlang tur awmchhun, Chhattisgarh chuan nimin khan inthlan thawh khatna neiin, seat 20 atan inthlanna neih a ni.

Inthlan neihna assembly bial 20-ah hian candidate 223 awmin, voter 40,78,681 an awm.

Phase I inthlanah hian Mohla-Manpur, Antagarh, Bhanupratappur, Kanker, Keshkal, Kondagaon, Narayanpur, Dantewada, Bijapur leh Konta seat-ah vote hun chhung hi zing dar 7 aṭanga hawn ṭan niin, tlai dar 3-ah khar a ni. Khairagarh, Dongargarh, Rajnandgaon, Dongargaon, Khujji, Pandariya Kawardha, Bastar, Jagdalpur leh Chitrakot seat-ah chuan zing dar 8 aṭanga tlai dar 5 thleng vote hun chhung hi hawn a ni thung. Nimi tlai dar 5-a tarlan danin, vote tla 70.8% a tling. Vote tlak ṭhatna ber chu Mohla-Manpur assembly constituency niin, 73% a tla tawh a ni.

Seat 20 zinga seat 12 te hi Maoist hel chet hluarna, Bastar huam chhunga awmte an ni a, heng area-ah hian polling booth 600 awmin, a vaiin polling booth hi 5,304 buatsaih a ni. Sorkar chuan hlauhthawn thilah assembly constituency 5-a polling station 149 te chu a bul hnai police station leh security camp-ah te a sawn bawk. Chhattisgarh Bastar region-ah hian venhimna khauh tak dah a ni a, venhimna hna thawk tur hian Central Armed Police Force (CAPF) mi 40,000 leh state police mi 20,000, an vaiin, mi 60,000 chuang dah luh an ni. Hetih lai hian Tondamarka area-a Sukma-ah Maoist-te chuan bomb tipuakin, bomb puakah hian CRPF CoBRA battalion sipai pakhatin hliam a tuar. Venhimna hna thawktute leh Maoist te hi Tadmetla leh Duled khuaahte minute 20 vel an inkap bawk. Inkahnnah hian sipai lamin hliam an tuar niin official-te chuan an sawi.