NGO 3-in human rights dan leh NGO-te palzutah India puh

Amnesty International, Charity and Security Network (C&SN) leh Human Rights Watch (HRW) te chuan India sorkar chu mihring dikna chanvo (human rights) palzut leh activist leh NGO-te hrekah puhin, Financial Action Task Force (FATF) te inrawlh turin an ngen.

NGO pathumte hian thuchhuah inṭawm siamin, India in FATF inkaihhruaina a palzut thu an sawi. "Mimal khuahkhirhna an siam nasa a, ralmuang taka pun khawm, pawl siam leh mimalin a duh ang a sawi leh tihlan theihna dante nek chep turin dan hlauhawm leh ṭha lo tak takte an siam. Chung zingah chuan; Foreign Contribution (Regulation) Act (FCRA) te, Unlawful Activities (Prevention) Act te leh, Prevention of Money Laundering Act (PMLA) te a tel," tiin an tarlang.

An thuchhuahah chuan kum 10 ral ta chhung khan thuneitute chuan FCRA license 20,600 chuang titawpin, 2022 bikah NGO 6,000 te'n ram dang aṭanga pawisa an dawn ṭhin an tihtawpsak bawk thu an tarlang. "India hian firfiakte man an nih theihhna tura a dan siam, UAPA hi mihring dikna chanvo atana beitute leh activist-te man nan a hmang ṭhin. He dan hmang hian Citizenship Amendment Act dodalnaah zirlai tam tak an man a ni. Heng bakah hian human rights activist 16 te lakah thubuai an theh lut bawk a, heng zinga 8 te hi Bhima Koregaon case avanga 2018-a mante niin, vawiin thlengin an la tang a ni," an ti. UAPA chu sorkar sawisel leh beitute hrek a, man a, hrem nana an hman nasat thu an tarlang bawk.

FATF hi pawisa chheprelh leh firfiakte ṭanpuitu hrekna kawnga India hmalak dan endik turin an ṭhu khawm dawn a, NGO pathumte hian India chet dan hi FATF ṭhut khawm huna sawihona neih beiseiin thuchhuah an siam niin ngaih a ni. Amnesty International bik hi India sorkarin PMLA hnuaiah September 2020 khan an bank account a lo kharsak tawh a, hei vang hian kum thum zet hnathawk thei lo leh, an aiawha ding tur dan hre mi pawh ruai thei loin an awm mek a ni.