Prime Minister Narendra Modi-a'n Uniform Civil Code (UCC) chu ram puma hman vat a duh thu a sawi hnuah Aam Aadmi Party (AAP) chuan UCC hman chu an thlawp thu an sawi ve leh. Hetih lai hian All India Muslim Personal Law Board (AIMPLB) leh Shiromani Akali Dal te chuan UCC hi an dodal thu leh, an ngaihdante Law Commission-a thlen an tum thu an sawi.

AAP-in UCC thlawpna an puan hi 2024 Lok Sabha inthlan lo awm tur atana eptu party-te'n ṭanghoa hmachhawn an tum lai a ni a, eptu party-te inlungrual lohna tilanga ngaih a ni.

AAP General Secretary (Organisation), Sandeep Pathak chuan, AAP hian UCC hi eng emaw chenah thlawp mah se, mi tam zawk remtihnaa hman an duh chauh thu a sawi. Political party ni lo pawh UCC hman chungchangah rawn vek an duh tih sawiin,"Thil ṭhenkhat hi chu nakina siam ṭhat theih tawh loh a ni ṭhin. Midang remtihna tel loa hman a nih chuan nakinah mi tam zawkin lungawi lohna an la lantir leh mai ang," a ti.

AIMPLB member, Maulana Khalid Rasheed Firangi Mahali chuan,"AIMPLB chuan Uniform Civil Code hi kan theihna zawng zawngin kan dodal dawn. Sorkarin hmalak a tum dan dodal thei tur hian awmze nei zawka Law Commission-a kan hek theih nan kan ngaihtuah mek," a ti thung.

BJP thawhpui ṭhin, Shiromani Akali Dal chuan UCC hman vat duhna hian India inpumkhatna leh mipuite inzawmna a tichhe thei dawn niin an sawi. "Hnam tlem zawk chauh ni loin, tribal society, mahni hnam dan nei hrang tawh phawtte chu he UCC hian a nghawng vek dawn a ni," tiin SAD hruaitu Daljit Singh Cheema chuan a sawi. Mimal tana dan siam ṭhenkhatah fuh loh lai a awm a nih chuan UCC hmang kher loin, a fuh lo lai chu siam ṭhat ni mai rawh se, a ti.