Karnataka sorkarin buhfai kg 5 aiah pawisa a pe dawn

Karnataka-a Congess sorkar chuan Anna Bhagya scheme kaltlanga BPL chhungkaw tana buhfai kg 5 zel pek belh tur chu sorkar laipui atanga an beisei ang an hmuh theih loh avangin, buhfai aiah pawisa fai a pe dawn. Buhfai hi kg 1 Rs 34 zela hisapin, kg 5 man chu a sumin a pe dawn a ni.

Chief Minister Siddaramaiah chuan a sum faia an sem tur chu lo hman lailawk lawk a nih thu sawiin, "Kan thuthiamah kan ding tih lantir nan pawisaa pek mai hi kan tum rih a ni. Kan mamawh tawk buhfai kan hmuh theih hunah pawisa sem hi titawpin buhfai kan sem leh ang," a ti. Buhfai supply-tu tur an hmuh theih nan open-market tender an chhuah thu a sawi bawk.

Food and civil supplies minister KH Muniyappa chuan,"Buhfai hi ton 22,000 kan mamawh a, hetiang zat neih hi kan sorkar tan hian a har lo ang," a ti. Buhfai a awm hma chuan BPL chhungkaw tin hian July 1 aṭangin Rs 170 zel dawngin, member panga an nih chuan Rs 850 an dawng thei dawn a ni. An pawisa dawn tur hi chhungkaw lu ber account-ah Direct Benefit Transfer (DBT) kaltlanga thun a ni ang.

Sorkar laipuiin Karnataka-a PDS card nei thei chin tur nuai 70 ti mah se, a bituk aia chhungkaw nuai 14-a tam hnenah state sorkar hian BPL card hi a pe a ni. Hei vang hian heng chhungkaw 14-te hnena a thlawna buhfai sem hi a tum a ni.

Karnataka-a inthlan hnuhnung berah khan Congress hian thla tina PDS hnuaia BPL chhungkuate tan buhfai a thlawna an dawn ṭhin, kg 5 chu kg 10-a tipung turin a lo intiam tawh a ni. CM Siddaramaiah hian scheme chu July 1 aṭanga an kalpui tan tur thu a puang. Mahse sorkar laipuiin FCI hnenah Karnataka chu buhfai lei belhtir lo tura a tih avangin Karnataka hian buhfai kg 5 aiah pawisa fai sem an tum ta a ni.