Sorkar laipuiin loneitute tan vbc nuai 3.70 hu scheme pawm

Union cabinet chuan loneitute tan scheme, Rs vbc nuai 3.70 hu a pawm tih Union Health Minister Mansukh Mandaviya chuan Nilaini khan a sawi.

Health Minister chuan,"Prime Minister Narendra Modi-a'n loneitute ṭanpuina tur scheme hi min pawmpui tawh a, he scheme-ah hian thil chi hrang hrang awmin, lo neih dan kalphung daih rei zawk zirtir chunga loneitute dinhmun chawikanna tur pawh a awm a ni" a ti.

Loneitute'n man bithliah sa veka lei ṭha siamna tur an lei theihna tur, Urea Subsidy Scheme chungchang pawh sawiin,"Cabinet-in Urea Subsidy Scheme hi a pawm tawh a, urea bag khat, kg 45 chu tax leh sawngbawl man tel loa Rs. 242-a an lei reng theih nana hmalakna tur a ni. Kum thum chhung atan Urea Subsidy Scheme-ah hian Rs vbc 3,68,676.7 ruahman a ni bawk," tiin a sawi.

Heng bakah hian PM Programme for Restoration, Awareness Generation, Nourishment and Amelioration of Mother Earth (PMPRANAM) chu he scheme hnuaiah hian kalpui tel an tum tih a sawi bawk. He scheme-in a ken tel tur zingah hian sulphur coated urea (Urea gold) hmanna tur pawh a tel. Loneitute'n an hman mek, Neem coated urea aia man tlawm zawk leh thawk ṭha zawk niin a sawi bawk. Mandaviya hian Pradhan Mantri Kisan Samruddhi Kendras (PMKSKs) pawhin nuai a kai tawh thu sawiin,"PMKSK pawh a sang chho zel. Loneitute awlsam nan, loa an mamawhte chu hmun khata an hmuh vek theihna atan buatsaih a ni," tiin a sawi.