Parliament budget session thawh hnihna neih mekah, nimina Parliament in hnih rorel inkhawmah eptu MP-ten Congress hruaitu Rahul Gandhi MP a nihna hlihsak a nih vanga lungawi lohna an lantir avang leh, Adani Group buaina Joint Parliamentary Committee (JCP) chhuitir an phut thu an aupui leh avangin inkhawm tihtawp a ni.

Lok Sabha inkhawm chu eptu member-te lungawi loa an au bengchhen avangin tlai dar 4 thleng atan inkhawm tihtawp a ni. Congress member ṭhenkhat chuan thawmhnaw dum hain ṭhenkhatin puan dum an awrh. Inkhawm ṭan a nih veleh Wel-ah an kalkhawm nghal a, member pahnih TN Pratapan leh Hibi Eden-te chuan placard kengin, Rahul-a disqualify-na order paper chu Chair awmna lamah an vawm.

Rahul Gandhi disqualify a nih chungchanga Congress party lungawi lohna eptu party dangte pawhin an thlawp. Nimina rorel inkhawmah pawh hian National Conference hotu Farooq Abdullah chuan kurta dum a rawn ha a, Congress president hlui Sonia Gandhi pawhin thawmhnaw dumin a inthuam ve bawk. Member-te lungawi loa an auhbuai nghal avangin Lok Sabha speaker Om Birla chuan inkhawm ṭan a nih aṭanga rei loteah inkhawm a titawp nghal.

Rajya Sabha-ah pawh rorel inkhawm ṭan a nih aṭangin eptuten Adani Group chungchanga an thil phut an aupui leh nghal a ni, hei vang hian inkhawm tihtawp zui a ni ve bawk.

Congress bakah eptu party ṭhenkhat dang MP-te chuan Rahul disqualifty a nih avanga lungawi lohna lantir nan thawmhnaw dumin an inthuam a, chairman Jagdeep Dhankhar a ṭhut hma aṭangin an lungawi lohna thu an aupui nghal a ni. Eptute chuan Adhani buaina chungchanga a ṭawngchhuah duh loh avangin prime minister Narendra Modi chu beiin, Modi leh Adani chu ṭhianṭha an ni tiin an au el a ni.

Parliament rorel inkhawm tihtawp a nih hnuah pawh eptu MP eng emaw zat chuan Parliament pawn lamah lungawi lohna lantir chhunzawmin, Parliament aṭanga Vijai Chowk panin kawng an zawh. MP-te hian 'Save democracy' banner kengin kawng an zawh a, Vijay Chowk-ah sit-in protest an nei zui bawk.

Nimina Parliament session ṭan hma hian eptu party hrang hrangte chu Parliament Complex-ah Adani Group leh Rahul Gandhi disqualify avanga BJP sorkar nawr let dan tur ngaihtuahin an inhmukhawm. He hunah hian DMK, Samajwadi Party, JD(U), BRS, CPI(M), CPI, RJD, NCP, IUML, MDMK, Kerala Congress, TMC, RSP, AAP, NC leh Shiv Sena (UBT) bakah party dang hruaitute an tel a ni. Nimina meeting-ah hian Congress kaihhruai eptu pawlte intelkhawmnaa tel duh ngai lo, TMC chuan MP pahnih a tir a ni.