Karnataka sorkarin Muslim quota titawp

Karnataka-a BJP sorkar chuan OBC quota hnuaia Muslim-te tana 4% reservation siam chu a titawp.

Kar liam ta Zirtawpni khan sorkar chuan Muslim quota siamsak chu titawpin, he quota hi Vokkaliga leh Lingayat hnam tan a semrual thung a, Lingayat quota hi 7% leh Vokkaliga quota hi 6% ah a pung a ni. Karnataka hi kumina assembly inthlan nei tur an ni a, Lingayat hnam hi state mipui zinga 17% leh, Vokkaligas hi 15% vel awmin, heng hnam pahnihte thlawpna hi a pawimawh dawn hle a ni.

Union home minister Amit Shah chuan ram danpui nena inmil lo a nih avangin Muslim quota hi tihtawp a nih thu sawiin, 'Sakhaw behchhana reservation siamsakna tur hi ram danpuiah a awm lo," a ti.

HD Deve Gowda kaihhruai sorkar khan kum 1994 khan Mulsim-te pualin OBC quota hnuaiah 4% hi a dahsak a, kum 1995-ah pass a ni. Karnataka-ah hian other backward class hi economic, social leh educational status hmangin category pali - 2A, 2B, 3A leh 3B ah siam a ni. Heng category-a awmte tan hian sorkar hna lakna leh zirna inah reservation siamsak an ni.