Congress party president atana thlan, Mallikarjun Kharge chu nimin khan official-a party hotu lu ber atan ruat a ni ta.

Party president thar hian charge a lak hnuah a team thar tur a puang dawn a, hemi atan hian Congress Working Committee (CWC), general secretary leh in-charge zawng zawngte chuan banna an thehlut nghal a ni. Kharge hian a team tharte hi a puang thuai dawn a, CWC member 12-te erawh chu thlan an ni ang.

Congress party president a nih anga thu a sawina hmasa berah Kharge chuan, "Baba Saheb Constitution chu Sangh Constitution-a thlak tumna a awm mek a, hei hi Congress chuan a thlen a phal ngai lo ang," a ti. BJP 'New India' tihah chuan hna thawh tur nei leh mirethei an pung a, loneitute rahbeh an ni, tiin BJP sorkar chuan eptu pawl awm lohna siam turin theihtawp a chhuah a, mahse mipuite tana dingin Congress party chuan a bei let zel dawn a ni, a ti.

Udaipur declaration-a tarlan angin, an party-a post hrang hrangte chu hnawhkhah a ni ang a, social advisory committee siamin, hetah hian SC, ST leh OBC pual pawh dah a ni dawn tih Congress president chuan a sawi.

Kharge chuan kum 1969-ah Congress block committee member aṭanga bul ṭan chhoin, tunah party President a ni ta chu lawmawm a tih thu a sawi a, an party tihchakna atana theitawp lo chhuahtu Sonia Gandhi chu lawmthu a hrilh bawk.

Nimina Delhi-a AICC headquarters-a party president thar lawmna inkhawm buatsaihah hian central election authority chief Madhusudan Mistry chuan Kharge hi certificate of victory a hlan. He hun hi Bharat Jodo Yatra diwali chawlh hmang mek, party president hlui Rahul Gandhi pawhin a hmanpui a ni.

Kum 24 hnua Gandhi chhungkaw mi ni lo, Congress party president ni thei hmasa ber Kharge hian party hruaitu tur inchuhnaah khan MP Sashi Tharoor a hneh a ni. Tharoor chuan Congress party tana hna a thawhnaah, Mallikarjun chu a theihtawpin a thawhpui zel tur thu a sawi.

Party president kalchhuak, Sonia Gandhi chuan an party chuan chona hrang hrang hmachhawn mah se, a hmaa an lo tih tawh ṭhin angin lungrual leh chak takin hmalam an pan zel dawn tih a sawi. Kharge kaihhruaina hnuaiah Congress chu a chak chho zel dawn a ni, a ti. Party president thar chu tawnhriat nei ṭha tawh, a inpekna leh thawhrimna avangin party worker naran aṭanga tun dinhmun thleng thei a ni chu a lungawithlak thu a sawi. Congress president a nih angin a theihna zawng zawng a lo hmang tawh ṭhin a, mahse chung mawhphurhnate chu laksakin chhawk zangkhai a ni ta tih a sawi bawk.