Embassy-in Ukraine chhuahsan thuai turin India mite ngen

Ukraine-a Indian embassy chuan Thawhlehni khan India mi awmte chu a theih anga ranga Ukraine ram chhuahsan turin a ngen nawn leh. Kar liam ta, October 19 khan embassy hian ngenna hi a lo siam tawh bawk a ni.

Russia leh Ukraine indona thleng mekah boruak a chhe chho zel a, inbeihna a zual zel avangin an theih dan kawng kawnga Ukraine ram chhuahsan turin India mite hi a hrilh nawn leh a ni. Ramri thleng hruaitu tur an mamawh chuan embassy an biak pawh theihna tur number pawh an tarlang nghal bawk. India mite chu Hungary, Slovakia, Moldova, Poland leh Romania ramri kaltlangin Ukraine an chhuahsan theih tur thu a tarlang.

Ukraine ram hi India aṭangin zirlaiten an pan nasa a, a tam zawk chu MBBS zir an ni. Russia-in Ukraine a run hnuah zirlai tam tak chu an rawn haw a, mahse September thla aṭang khan an zirna chhunzawm turin eng emaw zat chuan Ukraine hi an pan leh tawh a ni.