India ramah Ningani khan Covid-19 kai thar 15,786 an awm belh leh a, Nilainia hri kai mi 18,454 aṭangin 14% in a tlahniam a ni. Sorkar laipui chuan theihtawpa chakin ramchhungah vaccine semchhuah hna hi an kalpui chhunzawm zel.
India rama mipui tluklehdingawn khat chuangin vaccine an la tawh a, ramin Covid-19 a dona kawngah hmasawnna mellung pawimawh tak a siam belh leh a ni.
Hri kai dama puan recovery rate chu 98.16% ni mekin March 2020 hnua a san ber ṭum a ni.
Ningani khan khan dama puan 18,641 an awm belh leh a, hri kai dam tawh hi 3,35,14,449 an tling tawh.
Hri kai mek, active case chu hri kai tawh zat aṭanga 1% ai pawhin a tlem zawk a, 0.50% ni mekin March 2020 hnua a hniam ber ṭum a ni. Hri kai mek 1,75,745 an awm a, hei hi ni 232 hnua a hniam ber ni a ni.
Kartina hri kai thar zat, weekly positivity rate chu 1.31% ni mekin, ni 119 chhung chu 3% hnuailamah a awm tawh.
Nitina hri kai zat, daily positivity rate chu 1.9% niin, ni 53 chhung chu 3% hnuailamah a awm tawh bawk a ni.
Ningani khan Covid vangin mi 231 an thih belh leh a. Hemi ni vek hian vaccine dose 61,27,277 semchhuah a ni.
Union health ministry chuan state leh Union Territory-ah Covid vaccine dose vbc 104.5 chuang pek a ni tawh tih sawiin, heng zingah hian hman loh dose vbc 11.65 vel an la kawl mek a ni, a ti.
Hetih lai hian World Health Organisation (WHO) chuan India rama Bharat Biotech Covid vaccine siam, Covaxin chu emergency use list (EUL)-ah a la telh lo a, hemi chungchang hi ngaihtuah mek a la ni. Bharat Biotech hian Covaxin hi EUL-a telh tura pawmsak turin April 19 khan EOI (Expression of Interest) chu WHO-ah a thehlut tawh a, mahse thutlukna hi an la siam lo a ni. WHO top official chuan mi tam takin WHO in a pawmpui thuai hi an beisei a, mahse hmanhmawh taka thil tih chi a ni lo a, a him ngei em tihte chiang taka an zirchian phawt a ngaih thu a sawi.
