UP sorkarin Lakhimphur Kheri case chhuitu SIT chief a sawn

Uttar Pradesh-a Yogi Adi­tyanath kaihhruai BJP sorkar chuan IPS officer paruk a transfer a, heng zingah hian Lakhimpur Kheri-a buaina chhuak chungchang chhuitu, Special Investigation Team (SIT) hotu Upendra Agarwal pawh a tel.

Agarwal hi DGP headquar­ters-ah attached a ni a, mahse sorkar chuan DIG Devipatan Range-ah a sawn a ni. Sawn ni mah se SIT hi a la ho chhunzawm dawn niin DGP Mukul Goel chuan a sawi.

October 3-a mi pariat thihna thlenna, Lakhimpur Kheri-a buaina thleng chungchanga inhnamhnawiha puh mi pali chu Ningani khan ni thum chhung police kuta awm turin local court chuan a ti. Police-te chuan buaina chhuaka mawhphurtu zinga puh, union minister Ajay Mishra fapa, Ashish Mishra pawh kawl chhunzawm an dil bawk a, hei hi court chuan nimin khan a ngaihtuah a ni.

He buaina kaihhnawihah hian mi 10 man an ni tawh.