Uttarakhand CM-in ruahsur vanga chhiatna tawkte tlawh

Uttarakhand chief minister Pushkar Singh Dhami chuan nimin khan Chamoli district-a Dungri khua tlawhin, ruahsur nasa leh leitawlh vanga an chhungte chante a tlawh a ni.

CM hi tourism minister Satpal Maharaj, state disaster management minister Dhan Singh Rawat leh official dangte'n ṭawiawmin, thing­tlang khuaa chhiatna thlen nasat zualna hmunte enfiahin hma lak dan turte an ngaihtuah.

October 19 khan Dungri khuaa mi pahnihte chu leminin a chilh hlum a ni. Dhami hian lusun chhungte hi tlawhin sorkar aṭangin ṭanpuina pek a tiam.

Official te chu ṭanpuina leh chhawmdawl hna chak zawka kalpui tura chahin, chhiatna thlenna hmuna mipuite chu mangang lo turin a chah bawk.

"An chenpui chantate hian sorkar aṭangin ṭanpuina an mamawh angte chu an dawng vek dawn a ni. An laichinte an chan a, nausen enkawl ngaite an ni a, enkawlna ṭha tak an dawn theih nan theihtawpin kan pui ang," tiin Dhami chuan a sawi.

Uttarakhand-ah hian ruahsur nasa avangin chhiatna a thleng nasa hle a, chenna in 60 chhiain mi 65 te chuan nunna an chan a, mi 22 -in in hliam tuarin chin hriat lohin mi pahnih an awm mek bawk.

Ruahsur vang hian thlai leh buh chinna ram zau tak a chhe bawk a, Chief Minister chuan chhiatna thleng vanga an thil chan hlutzawng hi Rs vaibelchhe 7,000 vel hu niin a sawi.