Mipui 95% in BJP an mamawh tawh lo : Akhilesh Yadav

Uttar Pradesh minister Upendra Tiwari-a'n fuel man sang chungchangah state mipui 95% in petro leh diesel an mamawh lo tih a sawi chu Samajwadi Party president Akhilesh Yadav chuan na taka chhangin, heng mipui 95% te hian BJP chu an mamawh tawh bik lo, a ti.

UP Minister Tiwari hian Ningani khan fuel man sang chungchangah BJP sorkar sawiselna awmte chu chhangin, per capita income ngaihtuahin petrol leh diesel man punna hi a tam lo a ti.

Hei bakah hian mipui 95% velin petrol leh diesel hi a mamawh lo, a ti bawk.

Akhilesh Yadav chuan Minister thusawi hi a twitter-ah chhang let nghalin, "Uttar Pradesh-a BJP minister chuan petrol man sang chuan mipuite a tibuai lo niin a sawi. Hetiang a nih chuan mipuite pawhin minister hi kea kal tirin ani pawhin petrol hi a mamawh bik lo ang. Thudik chu mipui 95% a tihte hian BJP hi an mamawh tawh lo a ni," a ti.