Cyclone Yaas tlehin chhiatna a thlen vangin Nilaini khan Odisha leh West Bengal khawchhak tuipui kama cheng mi pali an thi.
West Bengal chief minister Mamata Banerjee chuan cyclone tleh chuan an state a cheng mi vaibelchhe khat chuang a nghawng a, chenna in nuai thum vel chu luah tlak lohin a tichhia tih a sawi.
Thlipui tleh vang hian West Bengal, Odisha leh Jharkhand-ah mi nuai 21 vel chu hmunhim lamah sawnchhuah an ni bawk.
Odisha chief minister Naveen Paitnaik chuan Nilaini khan Cyclone Yaas tuartu khuate hnenah ni sarih chhung chhawmdawlna pek an ni dawn tih a puang. Ni sarih chhung chu ei tur leh eirawngbawlna atana an mamawh hmanruate a thlawnin pek an ni ang.
Odisha-ah hian tuipui kama khaw 128 bawr vel chu tuilianin a chim a, Balasore leh Bhadrak district-a khuate chu a tuar nasa zual an ni.
Cyclone-in a tihchhiat kawngpui pawimawhte chu siamṭha thuai tur leh electricity supply mamawh 80% chu darkar 24 ral hmaa siam ṭha leh turin CM chuan official te a hriattir nghal. Thlipui tleh hian kawngpui 605-ah chhiatna a thlen a, mahse nimin khan Jagatsingpur, Kendrapara, Jaipur, Balasore, Bdarak district-a kawngpui chhia zinga 495 chu siamṭhat an ni leh tawh a ni.
Biju Patnaik International Airport, Bhubaneshwar leh East Coast Railway (ECoR) te chuan Nilaini tlai aṭang khan hna an thawk leh ṭan tawh tih official te chuan an sawi. Cyclone tleh vang hian airport chuan thlawhtheihna service chu darkar 20 chhung a chawlh lailawk tir a, ECoR chuan rel 124 a chawlhtir bawk.
