Baba Ramdev lakah IMA lungawi lo
Indian Medical Association (IMA) chuan Nilaini khan prime minister Narendra Modi hnenah Yoga guru, Baba Ramdev-a'n Covid-19 vaccine chungchanga thuthang dik lo a thehdarh chu titawp tur leh, mipuite fuihpawrh tuma puhna thubuai siamsak turin an ngen.
Ramdev chuan Yoga camp-a kalte hnenah Covid-19 vaccine dose kima la tawh zingah vaccine la hmasa tu, doctor 10,000 chuang an thi tawh tih a hrilh a, he video hi social media lamah a darh nasa hman hle.
He a thusawi chungchangah IMA chu an lungawi lo hle a, ram puma vaccine pekchhuah kalpui ṭan a nih khan mipuite hlauthawnna tihrehna turin IMA hruaitute chu vaccine la hmasa tur zingah a inpe a ni, a ti. Ramdev-a thusawi chungchangah, "Mi tupawhin allopathic damdawiin mihring nunna a la an ti a nih chuan, ministry in enkawl dan tura a tihchhuahte a dodal tihna a ni" tiin IMA chuan a chhanglet.
Ramdev-a thusawi chu vaccine pek chhuah kalpui mek titawp tumnaah an ngai tih sawi bawkin, PM hnenah hian thu dik lo thehdarh ṭhin chu titawp thuai turin an ngen a ni. IMA chuan mite tana theihtawp chhuah ṭhintu medical doctor te zah lohna lantir leh, kal phung mawltak hmang tia a sawina chuan an rilru a ti na hle tih an sawi.
IMA chuan Ramdev chu Covid kai dam lote remchanga hmangin ama company a thilsiam te tihlar nan a hmang a, hei vang hian sorkar laipui inkaihhruaina khinglet zawnga a chet avangin Ramdev-a lakah hian a ṭul anga action la ngei turin PM an ngen.