May thlaa hri kai thar zingah Kum 18-30 inkar tam ber

India ramin Covid-19 hri leng thawh hnihna a tuar mek a, hri kai thar an pung nasain thihpui pawh an tam tawh hle.

Nilainia sorkar laipuiin data a tihchhuahah May thla chhunga hri kai thar zingah kum 18-30 inkar an tam ber.

Data-a a landanin, May 1-7 inkara ram puma hri kai thar zingah kum 18-39 inkar 26.58% an awm a, May 8-14 inkarah 25.89% an awm. May 15-21 inkarah 25.64% awm lehin, May 22-25 inkar khan 25.60% an awm leh bawk.

Kum 18-30 inkarte dawta hri kai tam leh chu kum 31-40 inkar an ni.

Hri kai zignah kum 31-40 inkar hi May 1-7 khan 23.13% awmin, May 8-14 inkarah 22.79%, May 15-21 inkarah 22.58% le hMay 22-24 inkarah 22.24% an awm.

Mi thiamten hri leng thawh thumna a thlena a tuar na tura nia an ngaih, naupang leh tleirawl zingah May thla chhunga hri kai thar an tlahniam thung. Kum 11-17 inkar hri kai thar hi May 1-7 khan 7.82%, an awm a, May 15-21 inkarah 4.89% leh May 22-24 inkarah 8.73% an awm a ni.

Nikum lama hri leng thawh khatna tuar nasa ber, kum 60 chunglam chinah hri kai thar an tlahniam bawk a, May 1-24 chhunga hri kai thar zingah kum 60 chunglam hi 13% an awm.

Hri leng thawh hnihna thleng mek hian ziaawm lam a pan ṭan a, nitina hri kai hmuh chhuah thar pawh an tlahniam sawt hle. Hethi lai hian mithiamte chuan a thawh thumna hi a thleng leh ngei dawn a, hemi atan hian theihtawpa lo inbuatsaih lawk a ṭul thu sawiin, inbuatsaihna a ṭha loh chuan healthcare system a tlusawp mai thei dawn niin an sawi.

Hri kai thar nuai 2.11 awm belh
Nilaini khan India ram pumah Covid-19 hri kai thar 2,11,298 awm belh lehin, hemi ni vek hian hripui vanga thi mi 3,847 an awm bawk.

Ram pumah hri kai hmuh chhuah tawh hi 2,73,69,093 awm tawhin, an zinga 3,15,235 in an thihpui tawh a ni. Union health ministry chuan India rama Covid-19 vanga thi zinga 70% chuang chu a hmaa natna benvawn lo nei tawhte an ni tih a sawi.

Nilainia hri kai hmuh chhuah thar zinga mi 33,764 chu Tamil Nadu state-a mi an ni a, Kerala-ah hri kai thar 28,798 an awm bawk. Maharashtra-ah hemi ni hian hripui vang thi tam berin mi 1,013 in an thihpui a, Karanataka-ah mi 530 leh Tamil Nadu-ah mi 475 an thi bawk.

India hi khawvela Covid-19 vanga thi mi nuai thum chuang awmna ram pathum zingah a tel. India bakah hripui thihpui tamna chu US leh Brazil an ni.

Khawvel pumah hri kai vbc 16 chuang awm tawh
John Hopkins University-in a tarlan danin, khawvel pumah Covid-19 hri kai hmuhchhuah hi 16,81,81,146 an awm tawh a, an zinga 34,94,001 in an thihpui tawh. US chu hri kai leh thihpui tamna ber ram a la ni chhunzawm zel a, hri kai hi 3,31,90,016 awmin, mi 5,91,947 in an thihpui tawh a ni. India chuan hri kai tam lamah US a dawt.

US leh India tih loha Covid-19 hri kai maktaduai 3 chuang awmna ramte chu - Brazil (1,62,74,695), France (56,83,143), Turkey (52,12,123), Russia (49,68,421), the UK (44,86,168), Italy (42,01,827), Germany (36,67,041), Spain (36,57,886), Argentina (36,22,135) leh Colombia (32,94,101) te an ni.

Brazil chu US dawta hri vanga thi tamna ber ram niin, Covid-19 vangin mi 4,54,429 an thi tawh. Hripui vanga mi nuai khat chuang thi awm tawhna ram dangte chu - India (3,11,388), Mexico (2,21,963), the UK (1,28,010), Italy (1,25,622), Russia (1,17,595) leh France (1,09,185) an ni.