A ṭul chuan kum 2024 thleng kan nuar dawn : BKU Leader

Loneitu pawl, Bhara­tiya Kisan Union (BKU) leader Rakesh Tikait chuan farm law thar pathum sut tura sorkar laipui phuta nawrh an huaihawt mek chu a ṭul anih chuan kum 2024 thleng an nuar dawn tih a sawi.

Loneitute hian farm law duh lohna lantirin thla ruk chhung nawrh an huaihawt tawh a, sorkar laipui nena ṭum eng emaw zat inbe tawh mah se inremna an la siam thei lo.

Nilaini khan loneitute an lungawi lohna lantirna kal zelah 'Black Day' an hmang a, hei hi eptu party hrang hrangte chuan an thlawp a ni. Hemi ni hian turban dum khumin, an nawrh huaihawtna hmunah flag dum te an tar bawk.

Rakesh Tikait chuan, "Sorkar hnenah inbiakna chhunzawm leh tura ngenna pawh kan thlen tawh a, mahse tun thlengin a chhanna kan la hmu lo. Hetianga mi tihkhawtlai hian kan zuai phah an ring a ni maithei, mahse an ring dik lo ang. A ṭul a nih phawt chuan kum 2024 thleng kan nuar chhunzawm zel dawn a ni," tiin fur lo thleng tur atan pawh an nawrh huaihawtna hmuna an awm chhunzawm zelh theihna turte an buatsaih tih a sawi.

Hetih lai hian nawrh huaihawtna hmuna loneitu awmkhawmte hi an kiam tawh hle thung a, hripui leng vang leh fu seng a hun avangin tam takin an khaw lam an pan tawh a ni.