Farm law thar pathum duh lohna lantira loneitu pawl hrang hrangten hun rei tak nawrh an huaihawt hnuah, sorkar laipui chuan heng dan thar pathumte hi thla 15 chhung hman rih loh a rawt. 

Nikum November thla aṭanga  nawrh huaihawt tawh, loneitute hian farm law siam tharte hi sut vek an phut a, hei vang hian sorkar nena ṭum eng emaw zat inbiakna an neih tawhah pawh inremna an la siam thei lo a ni. Sorkar chuan sut a tum lo tih sawiin, siam ṭhat erawh a inhuam thu a sawi thung a ni. 

Sorkar laipui chuan thla 18 chhung dan tharte hi hman rih lo a, hemi chhung hian loneitute duh dante thlir a, an buaina chinfel dan ngaihtuah tura joint committee din a rawt bawk a ni. Sorkarin farm law chungchanga rawtna a siam hi an pawm nghal  mai thei lo a, an sawiho ve leh phawt tur thu loneitu pawl hruaitute chuan an sawi.  

Supreme Court chuan heng dan pathumte hi hman rih lo turina lo 'stay' sak tawh a, committee of expert a din bawk. Court chuan committee hi loneitu leh sorkar lam aiawhte pawh be kual a, thla hnih chhunga report thehlut turin a tih a ni. Commitee hian Thawhlehni khan meeting hmasa ber neiin, loneitute lam aiawhte an kawm a ni.

Union agriculture minister Narendra Singh Tomar chuan vawiinah loneitu aiawhte nen inbiakna an nei leh dawn a, inremna pawh an siam theih ngei a beisei thu a sawi. Hun rei tak nawrh huaihawt chu khawtlang tan pawha a ṭhat loh thu sawiin, minister chuan loneitute nawrh huaihawt mek chu tawp vat tawh se an duh tih a sawi a ni.

Loneitute hian farm law duh lohna lantira Republic Day, January 26-a Delhi-a tractor rally neih an tum chu kaltlangpui an tum a, Ningani khan thingtlang khaw hrang hrangah rehearsal an nei. Tractor rally neihnaa tel tur hian state dang aṭangin loneitute hian nawrh huaihawt mekna Delhi border an pan a, January 26 hian Delhi border-a nawrh an huaihawtna hrang hrang aṭangin Delhi khawpui panin tractor rally hi neih an tum a ni.

Rally hi four-tier-a neih a ni dawn tih an hruaitute chuan sawiin, a hmasa ber chu union leader, sorkar laipui nena inbiaknaa tel ten an ho ang. A pahnihna chu hmeichhiain an ho ang a, a pathumnaah ṭhalai zualte awmin, a palinaah chuan loneitu ni lo, an nawrh huaihawt thlawpa lo telte an awm thung ang. 

Tractor-te hian Delhi Outer Ring Road-ah rally hi neiin, loneitute thil phut chungchang lantira tableau-te pawh pho lan a ni bawk dawn a ni. Rally-a tel tur tam zawk hi Punjab, Haryana, Uttar Pradesh, Rajasthan, Madhya Pradesh leh Uttarakand aṭanga Delhi pan mekte an ni dawn a, Delhi border-a nawrh huaihawtna tractor awm sa zinga 10% vel an tel bawk ang.