Nagaland CM-in district thar a hawng

Nagaland chief minister Neiphiu Rio chuan Nilaini khan state chhunga district siam thar ber, Noklak district a hawng. District hi 12 a awm ta a ni. 

CM chuan, "Nagaland district 12-na, Noklak district ka hawng thei hi ka lawm hle a, Noklak district mipuite duhsakna ka hlan e. Sorkar thawhpui a, hmasawnna thawhna kawngah midangte entawn an nih ngei ka beisei," a ti. 

Noklak-a district thar hawnna inkhawm buatsaihah Chief Minister hi deputy chief minister Y Patton leh official dangten an ṭawiawm a ni. 

Deputy CM Patton chuan Noklak district mipuite a lawmpui thu a twitter-ah tarlangin, Nagaland-a People's Democratic Alliance (PDA) sorkar chuan state mipuite tan theihtawp a chhuah thu leh, Noklak district siam pawh chu an thil tum zinga a tel thu a sawi. Noklak district chuan hmabak tam tak a nei dawn tih sawiin, hemi atan hian state sorkar leh Noklak district mipuiten thawhhona ṭha tak an neih a ṭul thu a sawi a ni. 

Kum 2017, December 21 khan state sorkar chuan Noklak sub-division chu district puitlingah a hlangkai a ni. Tuensang district aṭanga siam niin, kum 2004 khan Tuensang aṭang vek hian Kiphire leh Longleng district-te siam an lo ni tawh bawk. District puitlinga hlankai a nih hnuah pawh nikum July 10 thleng khan Noklak hi sub-division angin a la awm chhunzawm a, July 30-ah  Noklak district additional deputy commissioner atan Reny Wilfred chu dah a ni chauh a ni.