AP CM-in kawtkaia ration buhfai pekna tur hawng

Andhra Pradesh chief minister Jagan Mohan Reddy chuan ration card holder-te hnena an kawtkai ngeia buhfai pek an nih theih nan nimin khan mobile dispensing unit 2,500 a hawng. CM chuan ration semtu tur motor rualte vawiin hian a vailiam ang. 

CM Reddy chuan ration buhfai la tura kum upa zawk leh taksa lama harsatna neite rei tak tak intlar ngai ṭhin chu ṭha a ti lo tih sawiin, "Sorkar chuan ration card holder-te hnenah an kawtkaiah ngei ration buhfai leh supply dang pek an nih theihna turin hma a la ta a ni. Mobile vehicle hmangin buhfaite ṭha hi card holder-te hi sem zel an ni tawh dawn a, hemi atan hian sorkar chuan kum khatah cheng vaibelchhe 830 vel a sen belh a ngai dawn a ni," a ti. 

Reddy chuan sorkar hmasa, TDP sorkar lai khan ration buhfai a chhe thei hle a, hei vang hian mipui tam zawkin an la duh lo niin a sawi. Mahse a kaihhruai sorkar a din hnuah buhfai quality ṭha zawk pek chhuah a ni tawh tih a sawi bawk. Thingtlang lamah volunteer-te hmangin buhfai hi cardholder-te kawtkaiah sem vek tum a ni a, mobile vehicle-ah hian GPS dah vek niin, card holder-te pawhin mobile app hmangin an sem hun turte an hre thei dawn a, heng motor-te hi thla khatah ni 18 chhung tal ration sem hian an tlanchhuak ṭhin dawn a ni. 

Ration semna tur mobile vehicle hi sorkar chuan 9,260 a lei a, a leina atan hian cheng vaibelchhe 539 zet a seng.