PM Modi leh CM-ten a thawh hnihnaah vaccine la dawn

Prime minister Narendra Modi leh chief minister zawng zawngte chu Covid-19 vaccine pek chhuah thawh hnihnaah vaccine pek an ni dawn. 

January 16 khan ram pumah Covid-19 vaccine pek chhuah ṭan a ni a, a thawh khatnaah hian healthcare leh frontline worker-te  hnenah vaccine hi pek a ni. Vaccine pek thawh hnihna hi kum 50 chung lam leh natna benvawn neite hnena pek tura tih a ni. Hemi rual hian Prime Minister leh Chief Minister-te bakah, MP leh MLA zingah kum 50 chunglamte hnenah pek vek an ni ang. 

Vaccine pek chhuah ṭan hmaa CM-te meeting a neihpui ṭum khan PM Modi chuan vaccine dawng hmasa tura an hmanhmawh a ṭul loh thu a lo sawi tawh a ni. State ṭhenkhat, Haryana, Bihar leh Odisha CM-te khan MLA, MP leh public representative-te chu frontline worker zingah telh a, vaccine pek hmasaka telh turin an rawt a, mahse CM chuan hmanhmawh lo turin a hrilh. 

Vaccine pek chhuah ṭan ni khan mi 1,91,181 te hnenah pek a nih thu union health ministry chuan a tarlang. PM chuan vaccine hi dose hnih zel lak tur a nih avangin a lo la tawhte chu dose hnihna ngaihthah lo turin a ngen a, vaccine chungchanga thuthang dik lo awmte ngaihven lo turin a chah bawk. 

Modi chuan khawvela mi vaibelchhe 30 chuang awmna ram pathum chauh a awm tih sawiin; India, US leh China a ni tih a sawi. India rama vaccine pek thawh khatnaah hian mi vaibelchhe thum vel hnenah pek a ni dawn a ni.